No. 100. Wataking bayi miturut lahire dina lan pasaran.

Yèn lahire ing dina lan pasaran:

  • Jumuah Kliwon: Yèn lanang ora micara, mung sedhengan baé. Yen wadon nas, marang wong lanang ngéwani.
  • Setu Legi: Cukeng, pinter golèk milik, blaba, ngingua jaran, wasis sarta sugih.
  • Akad Paing: Wegig, pikiré prayitna, weweka, semu dhiri piyangkuh kaya amutera jagad.
  • Senèn Pon: Manis wicarané, bisa ngenaki pikir sanamaning wong lan bisa golek rejeki.
  • Slasa Wagé: Lumuh wuruk, ora micara. Yèn wong wadon prayoga, bisa simpen arta.
  • Rebo Kliwon: Wegig micara, ing pikir calimut marang wong wadon, mawi rusuh watak pandhita.
  • Kemis Legi: Berpikir, lumuh kaungkulan. Yèn wadon luwih candhala, mring wong lanang ngéwani padu.
  • Jumuah Paing: Meneng, yèn busuk babar pisan, yèn pinter dadi panutuné wong akeh, sugih kapinteran.
  • Setu Pon: Bisa kriya gawené, yèn lanang. Yen wadon bisa golèk melik ambalubud.
  • Akad Wagé: Gedhe karepé, yèn duwé pikir ora kena dipalangi. Yen wadon ala.
  • Senèn Kliwon: Anteng pikire, yèn ijin enom bandhol sadhelo, yen wis tuwa alus pikire.
  • Slasa Legi: Kurang micara, yen juweh wegig, barang Ing pikir apik, kapara ngutuh, wekasane ala.
  • Rebo Paing: Mungguh umpakan, kapara diri, lumuh kungkulan, satemene cocogan, pikiré banter.
  • Kemis Pon: Anteng pikire, piyangkuh, meneng, besus samubarang ora ketara, piyangkuh gemi tegese.
  • Jumuah Wage: Bisa micara, juweh receh patitis, cetha nanging cengkiling, lanang nanging kerep kesandhung.
  • Setu Kliwon: Bodho ngaku pinter, lalen nanging temen, lumuh maju gawe.
  • Akad Legi: Lalèn kurang wegig kapinterane, karemane madon, kang padha laku ala panggawe ngiwa.
  • Senèn Paing: Murka marang pagawéyan samubarang sedhengan, yèn wadon pikiré luwih prayoga.
  • Slasa Pon: Kurang pikir, lumuh ing prakara, yèn wadon sae, prayoga sinelit ing priyayi.
  • Rebo Wagé: Sedhengan barang pikire, maju ing gawe. Yèn wadon candhala marang wong lanang.
  • Kemis Kliwon: Kurang pikire pethel ing gawe yen wadon sedhengan ing pamikiré iku.
  • Jumuah Legi: Èlu-èlu ora duwe pikir dhéwé, yen kalah gela jro batiné, langkung susah atine.
  • Setu Paing: Lanang wadona bisa golèk mélik, bisa simpen wicara alus utawa agal.
  • Akad Pon: Kurang pikir, pracaya ing liyan. Yèn wong wadon prayoga, bisa simpen kayane wong lanang.
  • Senèn Wagé: Kurang pikire, bregundung atiné, wani pakéwuh, wani mati. Yen wadon becik.
  • Slasa Kliwon: Yen busuk babar pisan yén pinter dadi pujangga utawa ngulama.
  • Rebo Legi: Lumrah prasaja, njaluk gelem, dijaluki awèh. Yen wadon prayoga sabarang pikire.
  • Kemis Paing: Tentrem anteng, tan amikir, maju gawe temen, dadi priyayi cendhak marang wong agung, sedhengan samubarang gawene.
  • Jumuah Pon: Wegig sajroning pikir. Yèn nora kaduga mlengos, ewo atiné kang ala.
  • Setu Wage: Lalen panggrahitane, pikire sajroning ati kaku, lengus sadhela nuli mari.
  • Akad Kliwon: Murka sugih karep. Yen wadon boros ing darbeké.
  • Senèn Legi: Anteng ora dhemen micara, welu karepé. Yèn wadon becik sabarang gawene.
  • Slasa Paing: Isinan kaku pikire andhap patrape, lumuh mring pagaweyan. Yèn wadon remen mengku kakunge.
  • Rebo Pon: Kuat pikire sregep ing gawe, temen sedyané. Yen wadon gemi, nanging kaku pikire.
  • Kemis Wagé: Banter budine, saguh ing gawe, kuwat sabarang pakewuh. Yèn wadon pikire ora lilan.

No. 101. Wataking bayi miturut tanggal nalika lahir.

Yen lahir Ing Tanggal:

  1. Angkuh, gedhe sedyané, yèn kesandhung babar pisan wurung, dadi urusaning wong.
  2. Sugih anak sugih mitra, pilih kasih semu lengus, lalèn.
  3. Suméh prasaja, kaku gelis lejaré, golongané kakon atèn, nanging gemati.
  4. Wegig micara, akèh pikiré becik, élingan sabarang.
  5. Micara, maratangan, mara cangkem, loma ing bojakrama.
  6. Busuk lalèn sabarang pikir, crobo sabarang ginarap, kesed resikan tani pikire.
  7. Wegig micara, rada pareng maring wong wadon ingkang ala pikiré saru.
  8. Sugih étung ala becik, sugih sadulur lan rukun ing sabarang pikire becik.
  9. Kakon atèn, panasbaran, gelis lajaré, lumrah pikiré, lila sabarang.
  10. Pepet sumber, lalen nanging wegig pikire, dhemen wewadul ala lan becik.
  11. Bèr pikire, jubriya sumangkéyan, nanging weruh tata ala becik.
  12. Dhemen semu olèh, yén meneng lengus, yèn récèh patitis samubarang wasis.
  13. Limpad pamicarané, patitis wegig, kaku mung sadhéla, brangasan nuli wasis.
  14. Sugih wicara, becik cetha weruh ing sabarang, suci lahir batin, pracaya pikire.
  15. Terang sabarang pikire, sedhengan, dadi pujangga, akèh wicarane kang suci.
  16. Busuk lalèn, crobo sabarang pikiré, kepara kesed sabarang gawe.
  17. Sugih étung ala becik, sugih saduluran, padha rukun barang pikire, prayoga suci.
  18. Wegig micara limpad, rada pareng madon, parengan ing ala lakune.
  19. Kakon aten, panasbaran gelis lejaré lila barang pikiré, murah bojakramane.
  20. Pepet pikiré lalen, wekel pikiré dhemen kena waduling wong ala lan becik.
  21. Bèr pikir jubriya sumangkeyan, nanging weruh watak ala lan becik.
  22. Dhemen pikir molah, yèn meneng bagus, yen juweh patitis nalare, kawruhé iku nyata.
  23. Limpad pamicarané patitis, wegig, brangasan nanging sadhéla bae lejar, pikiré sarèh.
  24. Suci, sugih wicara becik, cetha kawruhe, suci pikiré lahir batin.
  25. Terang sabarang, pikir sedhengan, dadi pujangga, akèh wicarane sabarang suci.
  26. Busuk lalèn crobo sabang pikiré, pagaweyané kesed lumuh, iku wong ala.
  27. Sugih étung ala becik, sugih sanak sadulur, padha rukun gawé.
  28. Sugih wicara nyenyengit tembungé, rada pareng mring wadon kang ala pikiré ngiwa.
  29. Kakon aten panasbaran, gelis lilih lejaré, pradhah ing bojakrama.
  30. Gedhe piyangkuhe, gedhe begjané, yèn kasandhung gedhe ora dadi ngapa.

No. 102. Wataking bayi miturut sasi nalika lahir.

  • Sura: Meneng, panggrahitaning angen angen yen pinter ngluwihi, mangkono uga yèn bodho iya ngluwihi bodhone.
  • Sapar: Brangasan, kebat cukat wicarane, samubarang gawe ora tlatènan, nanging solah bawané sarwa sareh.
  • Mulud: Kereng sakabéhé, bisa dadi priyayi, sugih sarta dhemen awèh pitutur becik.
  • Rabingulakir: Maratani, ala becik bisa mengku, kebat cukat tandangé, yen nepsu mbilaeni.
  • Jumadilawal: Bodho nanging setya legawa sarta ngandel marang awake dhewe.
  • Jumadilakir: Kendel, nanging andhap asor sarto pinter.
  • Rejeb: Lahiré bodho, nanging batine pinter ngungkuli sapadha padha.
  • Ruwah: Meneng, yèn clathu patitis, ginunggung ing sapadha padha.
  • Pasa: Anteng, becik atine.
  • Sawal: Keras lan kakarepane ora kena ingeluk ing liyan.
  • Dulkangidah: Tansah ngangkah panggawe becik.
  • Besar: Yèn becik ngluwihi becike, yen ala iya ngluwihi alane sring niwasi.

No. 103. Wataking bayi miturut mangsa nalika lahir.

Yèn lahire ing mangsa:

  1. Kasa: Wataké tengah-tengah.
  2. Karo: Crobo.
  3. Katelu: Cetil.
  4. Kapat: Resikan.
  5. Kalima: Juweh.
  6. Kanem: Pinter sabarang gawe.
  7. Kapitu: Cengkiling.
  8. Kawolu: Watake blaba.
  9. Kasanga: Rusuh calathune.
  10. Kasepuluh: Cugetan atèn.
  11. Dhesta: Seneng laku salah.
  12. Sada: Welas asih.

No. 104. Wataking bayi miturut neptu dina lan pasaran nalika lahir.

Neptune dina lan pasaran nalika lahir kagunggung banjur kapara 7, yen turah:

  1. Segarawasesa: Sabarang gawéné becik, akèh rejekine.
  2. Tunggaksemi: Lumintu rejekine.
  3. Satriyawibawa: Satiba tibane tansah nemu kapenak.
  4. Sumursinaba: Bisa dadi pangungsen.
  5. Bumikapetak: Bisa dadi tani.
  6. Satriyawirang: Tansah nemu pakéwuh.
  7. Lebukatiyupangin: Kerep ngalih panggonan, sarta tansah kakurangan.

Bab pétungan iki:

  • Neptuné dina: Jumuah (1), Setu (2), Akad (3), Senen (4), Slasa (5), Rebo (6), Kemis (7).
  • Déné neptuné pasaran: Kliwon (1), Legi (2), Paing (3), Pon (4), Wage (5).
  • Katrangan: Upama lahire dina Akad Wage. neptune Akad 3, Wage 5 = 8, kapara 7, turah 1, tiba pétung sagarawasése mangkono sabanjure.

No. 105. Wataking bayi miturut gunggungé neptune dina lan pasaran nalika lahir.

Yèn gunggungé neptune katemu:

  • 7 (Narima): Dhemen ulah kapandhitan, nanging wicarané tan kena kasoran, dhemen lelungan adoh.
  • 8 (Brangasan): Lan panasbaran, drengki kurang marta kang ati, akèh wong kang dèn brangus, dhemen padu, yèn nepsu sok mbilahèni.
  • 9 (Baranjalan): Omah-omah sring ngalih, sabané adoh, yèn duwé japa, ora mandi malah gawe karusakan.
  • 10 (Anteng): Sembada, yèn diwulang lantip, jero nepsune, baud lan bisa dadi dhukun, ora gelem tinakonan, juweh tresna marang sanak sadulure.
  • 11 (Mapan): Barès tur pralayan, wani ngambah ing wengi lan kendel, wani mati, dhemen weweh, loma maring sapadha-padha. Alane yen nandhang miskin, sring climut gelem njupuk barangé tangga.
  • 12 (Kurang panarima): Ing titah, akèh pangarahe, kasmaran mring kasinggihan, (dhemen kaluhuran), lananga wadona gampang golèk sandhang pangan, sring kelangan, tetepungane kurang manis.
  • 13 (Lanyah): Pamicarane, gungané kepati-pati, nanging atine becik, rukun runtut mring sadulure, yèn nepsu ala, betah melèk tinggal kalbu (melèk tanpa keperluan), yèn nyudagar watéké taberi dagang.
  • 14 (Sabarang pagawéyan bisa): Sadhéla bae banjur pinter, apa maneh yen diwulang banget anggone ngemen-emenaké, cacade rada sungkanan lan ora sugih, nanging lembah manah.
  • 15 (Gejarah): Bisa mréntah marang wong, keras tatas atine, cukup pambudine, ora kurang sandhang pangan, akèh mitrane kang padha asih, cacade sring padu bab tatakrama lan akrama.
  • 16 (Sedhep): Marang silakrama, sugih, juweh, sabarang cinipta ora luput amesthi dadi, yen bukti (memangan) ora kena pinalangan.
  • 17 (Meneng): Nanging cugetan aten, yen nyambutgawe sring niwasi, kerep dipaeéka wong, tan kena pinadhanan ing sapadha-padha.
  • 18 (Kaduk wani): Kurang duduga, yèn dinulu padune sembranan, yèn tukaran diwaneni banjur ngalah.

No. 106. Wataking bayi miturut gunggungé neptune dina lan pasaran nalika lahire kapara 9.

Yen turah:

  1. Dangu watu: Gedhe muktine kongsi tuwa.
  2. Jagur macan: Gedhe cilakane sugih satru.
  3. Gigis bumi: Gedhe prabawane kinawedèn déning wong.
  4. Keterangan srengenge: Gedhé cilakane, sanajan dadi priyayi uga mlarat.
  5. Nohan rembulan: Akèh begjane.
  6. Wogan uled: Mlarat.
  7. Tulus banyu: Becik sabarang gawéne.
  8. Wurung geni: Cilaka.
  9. Dadi kayu: Kinasihan wong agung, begja sapandhuwure.

No. 107. Wataking bayi miturut gunggungé neptuné dina lan pasaran nalika lahir kapara 8.

Yen turah:

  1. Ginuron keringan
  2. Dur rabèn apesan
  3. Nglampra mblaur
  4. Brama panan
  5. Kuat menangan
  6. Cantula
  7. Punjul
  8. Ilmu, lantipan

Katrangan:

  • Upama lahiré dina Kemis Paing neptuné Kemis 8, Paing 9, gunggung 17, kapara 8, turah 1, tiba Ginuron keringan.
  • Upama lahire dina Slasa Wage, neptuné Slasa 3, wagé 4, 3+4=7. Sarehning neptu 7 ora kena dipara 8, banjur dipétung neptu 7 mau dadi turahan, dadi pètunge tiba Punjul, lan sabanjure.
  • Neptune dina: Akad 5, Senèn 4, Slasa 3, Rebo 7, Kemis 8, Jumuah 6, Setu 9.
  • Neptune pasaran: Legi 5, Paing 9, Pon 7, Wage 4, Kliwon 8.